بقلم: ياسمين مدكور
النوع: فيلم وثائقي
المدة: 45 دقيقه
الموضوع: أسرار السكر.
اللغه: الانجليزية (ممكن تفتحوا الcaptions من تحت بالانجليزي)
بقالي فتره مهتمه بالأكل و إيه الأكل الصحي و ناكل إزاي و إمتى و إيه يتطبخ وإيه يتاكل ني و كل حاجه فيها calories قد ايه خصوصًا من ساعة ما بدأت ألعب رياضه و لإن ضغطي واطي فلازم آخد بالي كمان من الأكل اللي ممكن يساعد على توازن الضغط و السكر في الدم.
قريت كتير عن قول مأثور "احذروا شر الأبيضين" اللي هما الملح و السكر.
و كنت بستغرب ليه الناس اللي بتعمل أنظمة غذائية للتخسيس بيبطلوا سكر .. في الحقيقة هي إن السكر مبيتخنش مباشرة لكنه بيمنع الجسم من أداء وظائفه بشكل سليم اللي من ضمنها حرق الدهون.
التغيير اللي حصلّي بعد الفيلم ده:
بقيت مبمسكش حاجه غير لما ببص في المكونات.بقيت مهتمه بطرق استخدام العسل و الدبس (السكر المستخرج من التمر أو الرمان أو العنب) كبدايل للسكر.
بعد الفيلم بقيت بفكر في جسمنا كبشر بشكل مختلف .. إنه حرفيًا زي المكنه اللي لازم تختارها المناسب و المفيد ليها عشان تشتغل أحسن.
المتوقع انك هتركز فيه لما تتفرج على الفيلم:
معرفة أنواع السكر المفيد و المضر.نسبة السكر المضبوطه اللي بتخلق حالة من الإدمان للمنتجات.
السكر سبب من الأسباب الاساسية في أمراض كتير .. مش بشكل مباشر لكن ارتفاع نسبة السكر في الدم بيلخبط وظايف الجسم اللي من ضمنها حرق الدهون (يعني سمنه) أو الضغط و السيوله (أمراض القلب) أو التخلص من الخلايا الضاره (اللي ممكن تتحول لسرطان) و وظايف المخ بشكل سليم (آلزهايمر و انخفاض معدل الاستجابة).
إدماننا للسكريات و السكر و الحلويات و المنتجات المحفوظه و المعلبة مقصود و بيتم العمل عليه لخدمة الشركات الكبيرة.
السكر في كل المنتجات المحفوظه و في أغلب المنتجات اللي مبيعاتها عالية لإنها بتحتوي على النسبة المضبوطه اللي بتحقق المتعه و بالتالي بتوصل لمراكز المتعه في المخ (The bliss)
الفيلم فيه معلومات كتير مفاجئه و صادمه.