بقلم: مصطفى حلمي
عشان نريح الناس اللي بتجادل كتير في الجانب الديني في النظام ده..وبيقولوا إننا بنحرم ما أحله الله!!
ماحدش هنا حرم أي حاجه..إحنا مش بنزل تشريعات يا جماعه، ولا حد إتكلم أصلاً في مواضيع الحلال والحرام.
أنت لما بتروح لدكتور ويقولك بطل تاكل بسبوسه عشان سكرك بيعلى، مابتقولوش يا فاسق يا عدو الله، كيف تحرم البسبوسه وقد أحلها الله!!
لو حضرتك مابتحبش السبانخ أو الفسيخ أو الضاني أو الحرنكش، ماحدش بيهدر دمك أو بيقيم عليك الحد لأن الأكلات دي حلال وربنا ماحرمهاش، ومع ذلك أنت بكل مجون وإلحاد ما بتاكلهاش!!
الضفادع حلال وحضرتك مابتاكلهاش...الجراد حلال وحضرتك مابتاكلوش..الجواز من أربعه حلال، وحضرتك ماتجوزتش أربعه (إلا لو أنت متجوز اربعه، يابن المحظوظه)...السفر لنيكاراجوا حلال وسيادتك لسه ماروحتش...إيه الكفر ده؟؟؟
يا جدعان ربنا أحل حاجات كتير، لكن ما أمركش تعملها، وما حرمش تركها...ففين المشكله؟
لو أنت مقتنع إن الإمتناع عن اللحوم والألبان والزيوت أحسن لصحتك، إمتنع، مافيش أي فتوى في العالم بتقول إن اللي مابياكلش لحمه هيدخل النار.
ولو أنت مش مقتنع، كلهم، أنت حر، ماحدش أفتى خالص هنا ولا يقدر يفتي إن أكلها حرام أو حلال.
إحنا هنا بنقول إيه اللي مسموح في النظام وإيه اللي مش مسموح في النظام، لا إحنا دار إفتاء ولا الأزهر ولا حد فينا بيتكلم في الدين..إحنا بنتكلم في نظام أكل، وشكراً.