بقلم: أحمد طارق العادل
العملية بطيئة.. وبتاخد سنين طويلة.. وملهاش أي أعراض.
لسبب غير مفهوم، بيحصل تجمع لـلدهون ولـ (لايبو- بروتين) وحاجات تانية تحت بطانة الشريان، كل يوم، التجمع بيزيد مع مرور السنين فبيكون تضخم اسمه أثيروما atheroma، فالشريان بيضيق.
وبعد سنين كتير.. 40 سنة مثلاً.. العملية البطيئة بتبقى سريعة
الدم بيتجلط على الأثيروما، فالشريان بيتقفل.. فالجزء اللى الشريان بيغذيه بيموت.. فلو قفل شريان تاجى –بيغذي القلب – يبقى بيجيلك أمراض الشرايين التاجية (اللي 7 مليون سنوياً بيموتوا بسببها)، لو قفل شريان بيغذى المخ تبقى الجلطة الدماغية (اللي 6 مليون سنويًا بيموتوا منها).
التدخين ومرض السكر والدرن والوجبات المليانة دهون بيسرعوا العملية دى.
هل هو مرض طبيعى عند البشر كلهم؟ ولا فيه حاجة الناس كلها بيعملوها غلط؟
هو ملوش علاج.. وعندنا كلنا.. لكن هل ينفع نمنعه؟ اه ينفع نمنعه.. ازاى ؟
فيه نظريتين، واحدة معروفة، وواحدة مش معروفة!
..
ايه هى النظرية المعروفة؟
المتهم الرئيسى فيها هو الكوليسترول، الكوليسترول مش بيدوب في الدم، فاللي بيشيليه فى الدم نوع من الـ (لايبو- بروتين) اسمه LDL.. فى التجارب لقوا إن الأكلات اللى فيها كوليسترول عالى بتعمل تصلب شرايين، عشان كده ناس كتير بتقولك ابعد عن الكوليسترول.. ابعد عن الوجبات المليانة دهون.. لأنك لو هتاكل يوميًا منتجات حيوانية مليانة كوليسترول ..ألبان ولحوم وبيض.. هيبقى عندك تصلب الشرايين.. وممكن يجيلك أمراض القلب وجلطة فى المخ بعد 40 سنة لا قدّر الله!فـ من الأخر عشان تبعد عن تصلب الشراين.. سيب كل المنتجات الحيوانية.. خليك مع النباتات هى مفيهاش كوليسترول.. لكن..
هل ممكن يجيلك تصلب شرايين.. حتى لو أكلك مفيهوش كوليسترول..
هى دى النظرية اللى مش معروفة.
..
ايه هى النظرية اللى مش معروفة ؟؟
نقص فيتامين سى فى الأكل بيجيب تصلب شرايين!والنوع ده من تصلب الشرايين.. بييجى فقط للكائنات اللى مش بتصنّع فيتامين سى فى جسمها .. الإنسان والغوريلا وفأر(من نوع خنزير غينيا)
مين اللي قال كده؟
لينوس بولينج (معاه جايزتين نوبل 1954 , 1962) أثبتها سنة 1990، قال إن ده السبب الحقيقى فى تصلب الشرايين اللي بيجي للإنسان
هو اتأكد بالتجربة على فئران (من نوع خنزير غينيا) وزنها 550 جرام
اداهم نفس كمية فيتامين سى القليلة اللى أغلب البشر حالياً بيخدوها من الأكل.. الفئران اللى خدوا 2 ملليجرام فيتامين سى كل يوم مع الأكل جالهم تصلب شرايين ...اللى خدوا 40 ملليجرام فيتامين سى كل يوم مع الأكل م جالهمش !!
يعنى لو وزن الإنسان 70 كيلو... اللى بياخد 254 ملليجرام فيتامين سى مع الأكل بس بيجيله المرض.. واللى بياخد 5080 ملليجرام فيتامين سى كل يوم م بيجيلوش!
وكتير غيروا أثبتوا الكلام ده وعملوا دراسات بتأكد المعلومة دى!
باتيرسون 1940-1941، و ج ويليز 1953-1957، مكورميك 1957، زايتزيف 1964 ، سوكولوف 1966، جينتر 1969 ،اروين ستون 1972 ، جينتر 1978 ، هيميلا 1992 ، برايس 1996، مايدا 2000 ، برايس 2001 ، ناكاتا 2002 ، مكراى 2006 ، أجيرر 2008، راى 2010 ، على 2012 ، اوزكانلر 2012 ، ماى 2013 ، يان يون زو 2014، ارون 2015 ، بوجدانسكى 2015، سيتى 2015 ، م راث 2015 !
يعنى من الأخر.. تصلب الشرايين اللى عندنا كلنا وأساس السبب الأول للوفاة فى العالم بيحصل بطريقتين.. وتقدر تمنعهم!
الأولى: لو الكوليسترول كتير فى الأكل.
التانية: لو فيتامين سى بس قليل فى الأكل.
وبيحصل ب الاتنين مع بعض.. وده حال أغلب الناس النهاردة على الكوكب للأسف!
كل يوم فيه حاجتين احنا كلنا بنعملهم غلط.. بناكل منتجات حيوانية كتير ومبناكلش خضار وفاكهة!
وسهل جداً نصلحها.. لأن كل النباتات وبالذات الخضار والفاكهة فيهم الميزتين.. مفيهمش كوليسترول ومليانين فيتامين سى.. اليوم اللى كلنا هناكل كده .. تصلب الشرايين هيختفى!
...
هنجيب فيتامين سى منين؟
من الخضار والفاكهة.. دى نسب فيتامين سى فى كذا حاجة..فيتامين سى كميته بتقل لما الخضار والفاكهة يعدوا شوية.. بتقل مع الحرارة والطبيخ والأكل المتصنع..
كيلو العيش مفيهوش فيتامين سى وفيه 2650 كالورى!
كيلو الليمون فيه 530 ملليجرام فيتامين سى وفيه 290 كالورى
كيلو البرتقان فيه 532 ملليجرام فيتامين سى وفيه 470 كالورى
كيلو الفراولة فيه 588 ملليجرام فيتامين سى وفيه 330 كالورى
كيلو الفلفل الأخضر فيه 840 ملليجرام فيتامين سى وفيه 200 كالورى
كيلو البروكلى فيه 892 ملليجرام فيتامين سى وفيه 340 كالورى
كيلو الكيوى فيه 927 ملليجرام فيتامين سى وفيه 610 كالورى
كيلو الفلفل الأحمر فيه 1277 ملليجرام فيتامين سى وفيه 280 كالورى!
كيلو البقدونس فيه 1330 ملليجرام فيتامين سى وفيه 360 كالورى!
كيلو الفلفل الأصفر فيه 1835 ملليجرام فيتامين سى وفيه 270 كالورى!
كيلو الجوافة فيه 2283 ملليجرام فيتامين سى وفيه 680 كالورى!
المتوسط الطبيعى لفيتامين سى فى 110 نبات بيتاكلوا طبيعى 2300 ملليجرام لكل 2500 كالورى!
اليوم اللى كل الناس هتدخل جسمها 1000 ملليجرام أو أكتر - وده سهل أوى - تصلب الشرايين هيختفى!
#linus_pauling_and_atherosclerosis
البوستين دول فيهم قصة فيتامين سى للى عايز يعرف عنه أكتر ، موجودين ع الهاشتاج
#امنع_تصلب_الشرايين