بقلم: باسم يوسف
بما اننا هنا بنشارك تجاربنا أحب هنا اشترك معاكم بتجربة لطيفة قوي بصراحة فرقت معايا قوي. مبدئيا النظام اللي احنا ماشيين عليه مش سهل و خاصة ان "صناعة" الطعام مش مخلياك عندك اختيارات كتيرة سهلة و مريحة. لان بصراحة الاكل الصحي مافيهوش فلوس. حاجة تانية الا و هي العادات المتأصلة عندنا. احنا مرتبطين بالأكل اكتر من اي حاجة تانية في الدنيا. تلات مرات او اكتر بناكل. من و احنا صغيرين. فطار و غدا و عشا. لازم نفطر، لازم "نمسمر" بطننا قبل النوم. هل الفطار فعلا اهم وجبة في اليوم؟ هل الكلام ده صحي؟ طب ماهو كانوا بيقولولنا ان مافيش بروتين او كالسيوم الا في اللحوم و الألبان و طلع غلط..
عايز ارجع معاكم لبدء تطور الانسان شوية..
الانسان البدائي متعود على cycles معينة: الجوع و الشبع الجوع و الشبع. فعلا هو ما كانش بياكل الا لما بيجوع. دلوقتي ما بين وجبة و التانية مش بيعدي اربع خمس ساعات. احنا في دايرة الشبع طول الوقت. ما بتلحقش. الأكل متوفر طول الوقت. او أسوأ من كده بتفضل تاكل غلط طول اليوم و تيجي "تدبها" قبل النوم. فجسمك المفروض انه بدل ما ينام و يرتاح بيلاقي نفسه انه بيتعامل مع كميات مهولة من الاكل.
و على فكرة معظم "أعراض " الجوع مش جوع. دي أعراض انسحاب لو متعود على اكل اللحوم و الدهون و الألبان .
طيب ايه المشكلة انك تفضل شبعان على طول؟ فيه مشكلتين : واحد: اول ٨ ساعات من عدم الأكل الكبد بياخد من مخزون الجليكوجين اللي عنده. فلو الفرق ما بين الوجبة و التانية اقل من ٨ ساعات الجسم عمره ما حياخد من مخزون الدهون اللي عنده دايما حياخد من الكبد. اتنين و ده الأهم: بيحصل فيه نوع بسيط قوي من ال insulin resistance يعني بيحصل مقاومة من الخلايا لهرمون الأنسولين بس على خفيف مش زي مرض السكر فالحرق و ال metabolism بيقل .
الهضم يا جماعة حمل مهول على الجسم. ٨٠٪ من الmetabolism بتاعك بيروح الهضم تقريبا. عشان كده لما بتاكل وجبة تقيلة بتبقى همدان و مكسل. و طبعا كل لما الاكلة تبقى فيها دهون و لحوم و ألبان كل لما كان هضمها اصعب و تعبك أزيد. اللي عنده بيبي في البيت او اللي مربي حيوان أليف حيلاحظ حاجة بيعملوها بطريقة غريزية: لما بيمرضوا بيبطلوا اكل. بيخشوا في مود صيام تلقائي . و بكده ال ٨٠٪ طاقة اللي كانت رايحة للتعامل مع الاكل بقت تروح للجسم انه يتعافى من المرض. و ده اللي بيحصل مع الحيوانات في الغابة لما تمرض او تبقى مصابة. بيروحوا لمصدر ميه و يفضلوا يشربوا و ما ياكلوش لغاية لما يتعافوا.
طبعا انا هنا مش باقولكم ياللا نمنع الاكل. المشرحة مش ناقصة قتلى. انا جربت حاجة جميلة جدا اسمها صيام متقطع او intermittent fasting فيه انواع كتيرة منه. فيه منه ال خمسة زائد اثنين. و ده انت بتاكل عادي خمس ايام و بتنزل تحت ٥٠٠ سعر في اليومين اللي فاضلين. و ده انا لا أفضله. فيه طريقة تانية انا ماشي عليها بقالي كام شهر و ده يومي مش مجرد يومين في الأسبوع. و مريحاني قوي. بأكل اول وجبة الساعة ١٢ الظهر و اخر وجبة الساعة ٨. يعني باصوم ١٦ ساعة منهم ساعات نومي و باكل ٨ ساعات باي كمية و اي عدد وجبات انا عايزه (في حدود ال plant based diet طبعا)
الشرب مفتوح (شاي قهوة مية) في اي وقت. اشربوا زي ما أنتم عايزين سواء في الصيام ده او غيره. و دي نقطة مهمة جدا .عارفين احساس الجوع اللي بيجيلكم ده؟ معظم الوقت بيبقى الجسم عايز ميه. فممكن في أوقات كتيرة لو شربت ميه احساس الجوع ده بيقل (دي نصيحة عامة )
انا بافضل اني أبدا يومي بمشروب قلوي (ميه سخنة بلمون وشاي أعشاب و ابتديت تضيف عليه معلقة صغيرة هل تفاح، بس طعمه قوي جدا مش اي حد يستحمله، و خد مني وقت، و ابتديت أحط كمان شوية كركم)
انا عارف اني قلتلكم ان مش المفروض تجوعوا نفسكم و ده الصح عشان كده قلت في الاول ان البوست ده مش لأي حد. ده للناس اللي بقت مستريحة للنظام الجديد و علاقتها مع الأمل ابتدت تتغير. انا علاقتي للأكل اتغيرت تماما . بقيت امل عشان أعيش مش أعيش عشان اكل. الاكل لو لِسَّه عندك ادمان او وسيلة للتنفيس او سند نفسي فأنت مش مساعد للنظام ده.
النظام ده حيغير علاقتك بالأكل تماما و حتلاقي نفسك مستريح اكتر بكتير و بعد يومين تلاتة (الصعبين اللي في الاول ) كمية طاقة بتدب فيك مش طبيعية. و بيساعد جدا في حالات أمراض مزمنة بطريقة أسرع بكتير من مجرد الاكل النباتي لوحده.
حتصحى نشيط اكتر و حتلاقي نفسك بتنام بعيد عن ميعاد اخر وجبة (عشان كده لو بتصحى و تنام في مواعيد غريبة ممكن ئر من مواعيد الاكل شوية. حاول تبعد اخر وجبة تبقى على الأقل اربع ساعات عن ميعاد نومك)
لو ال ١٦ ساعة كتيرة عليك أبدا ب ١٢ ب ١٤ خدها حبة حبة.
و طبعا لو فيه كام يوم معرفتش تعمل ده مش أزمة. بس اللي حيستريح على النظام ده فعلا مش حيعرف يأكل تلات وجبات في اليوم تاني .
اعملوا بحث عن intermittent fasting و فيه Ted talk رائعة طولها ١٦ دقيقة تقريبا عن اثر الصيام كحماية من الالزهيمر .
اعتقد تدوروا على Ted talk why fasting bolster brain power
تاني : ده بوست مش لأي حد . بس اتمني أنكم تستفيدوا منه