بقلم: منار عبد الجليل
في اربع مفاهيم مهم نبقي عارفينهم ..
أولا : عن دورة ادمان السكر وعلاقتها بالسمنة ..
لما بناكل سكر أو أي أكل بيتحول لسكر في الجسم ، ده بيؤدي لرفع مستويات الجلوكوز في الدم ، وعشان البنكرياس يرجع مستويات السكر زي ما كانت بيفرز الانسولين .. الانسولين ده بينبه مستقبلات خلايا الجسم أنها تفتح عشان تستقبل الجلوكوز اللي جايلها وتستخدمه كطاقة لجسمنا .. لحد هنا مفيش مشكلة .. المشكلة بتحصل لما بناكل سكر أكتر من احتياج الجسم ..في الحالة دي الخلايا بتاخد احتياجها من الجلوكوز والباقي بيتحول لدهون بتتخزن في الخلايا .. وبعدها كل ما يرتفع مستوي السكر في الدم كل ما البنكرياس يفرز انسولين أكتر بس خلاص الخلايا بتقاوم الانسولين ده ومش بتستجيب ليه وبتخزنه كدهون ودي مشكلة معروفة اسمها ال insulin resistance أو "مقاومة الانسولين" .. في اللحظة دي علي الرغم من أن مستوي الجلوكوز في الدم عالي الا أن خلايا الجسم مش بتستخدمه ، وده سبب الاحساس بالتعب والارهاق والجوع واشتهاء الحاجات اللي فيها كربوهيدرات أكتر ..
وتستمر دورة الادمان ، ناكل سكر أو كربوهيدرات بسيطة فمستوي الجلوكوز يرتفع في الدم فالجسم يفرز انسولين كتير عشان ينزله والخلايا تخزن السكر الزيادة كدهون فالسكر ينزل مستواه في الدم فنبتدي نحس بالتعب والجوع تاني فناكل سكر تاني وهكذا .. an endless going cycle .. والعلماء كمان بيقولوا أن السكر بيحفز نفس مراكز المتعة pleasure centers في المخ اللي بيحفزها الكوكاين والهروين ، وده السبب في أننا بنحب الحلويات وبندمنها ولما بنكسر دورة الادمان دي بنحس بالتعب والصداع اللي هي بيسموها "أعراض الانسحاب" واللي بتحصل في الأول بس لكن بعد كدة خلاص .. والحل الوحيد عشان تكسر دورة الادمان دي أنك تقطع مرة واحدة مش بالتدريج عشان لو بالتدريج هتفضل تشتهي السكر والدورة هتستمر تاني ..
وبالاضافة لمشاكل السمنة ، "مقاومة الانسولين" كمان بتحفز نمو الخلايا السرطانية ومشاكل تانية كتير .. معاناة الشعب الأمريكي مع السمنة تتلخص في مشكلة "ادمان السكر" عشان أكلهم كله fast foods و processed foods ومنتجات مضاف عليها سكر ، ده غير المياه الغازية والحلويات .. واحنا لما بنقول ادمان السكر ما نقصدش بيه المعني الحرفي للسكر بس ..يعني ال starch كمان داخل معانا والكربوهيدرات البسيطة اللي الجسم بيحولها لسكر بسرعة .. يعني الدقيق الأبيض والحاجات ال refined عامة اللي بنشتريها مشكلتها أنها متشال منها القشور ومفيهاش ألياف فالجسم بيحولها لجلوكوز بسرعة ، ده عكس الكربوهيدرات المركبة والحبوب الكاملة (اللي بقشورها) عشان الألياف اللي فيها بتخلي الجسم يحولها لجلوكوز ببطء فمستوي السكر في الدم مش بيرتفع بسرعة وبالتالي الجسم مش هيفرز انسولين بكميات كبيرة وبالتالي الخلايا هتبتدي تتجاوب مع الانسولين تاني أو بمعني أصح تبقي sensitive للانسولين ، وطبعا كل ما تلعب رياضة الوضع هيبقي أحسن كمان .. كمان الألياف بتديك احساس بالامتلاء فمش هتجوع بسرعة ..
حاولوا علي أد ما تقدروا تاخدوا الطاقة اللي بيحتاجها جسمكم من الدهون المفيدة اللي في المكسرات وغيرها .. أو من الكربوهيدرات المركبة عامة .. حاولوا تاكلوا العيش الأسمر مش الأبيض .. والرز الأسمر مش الأبيض .. لأن الأبيض متشال منه القشور .. علي قد ما تقدروا يكون أفضل وهتشوفوا نتيجة أسرع ..
ثانيا
احنا لما بناكل حاجات طبيعية من الأرض جسمنا بيتعرف عليها وبيحولها لعناصر غذائية يستفيد منها .. لكن لما بناكل حاجات معلبة أو مغلفة فيها مواد غريبة علينا أو مواد حافظة ، الجسم مش بيتعرف علي المواد دي وبالتالي بيحولها لدهون .. عشان كدة العبرة مش بعدد ال calories .. يعني أنت لو قدامك ثمرة موز وبسكوت بالموز في السوبر ماركت ، وعلبة البسكوت دي فيها calories أقل من الثمرة ، اختار الثمرة برضو علشان البسكوتة المغلفة دي غالبا فيها مواد مضافة ومواد حافظة جسمك هيحولها لدهون ، بينما الثمرة الطبيعية جسمك هيستفيد بالعناصر اللي فيها .. فمتحسبهاش بال calories بس ..
ثالثا
الخضروات اللي فيها بروتين هي نفسها كمان هتساعدك علي حرق الدهون أكتر من الخضروات اللي فيها كربوهيدرات بصفة عامة زي البطاطس .. معلومة قد تبدو بديهية .. السبب في كدة أن الخضروات اللي فيها بروتين كتير زي البروكلي بتستهلك طاقة عشان تتهضم أكتر من الطاقة اللي فيها هي نفسها .. وبالتالي لما بناكلها جسمنا بيستهلك دهون من الدهون المتخزنة عنده عشان يهضمها .. الموضوع ده بيسموه ال Thermogenic effect .. وبالتالي كل ما تاكل الخضروات اللي فيها بروتين كتير كل ما جسمك يحرق أكتر من دهونه المتخزنة والنتيجة أنك هتخس أكتر ..
رابعا
خلي عندكم وعي أن فيتامين B خصوصا B2, B3, B5 and B6 بيساعدوا علي تحويل الدهون والكربوهيدرات لطاقة وبيساعدوا علي تظبيط مستوي السكر في الدم للمستوي الطبيعي .. باختصار بيظبطوا ال metabolism ..القرفة كمان بتظبط مستوي السكر في الدم .. وأي حاجة فيها كروميوم chromium بتظبط مستوي السكر في الدم وبتقلل الجوع أو ال cravings .. زي ايه ؟ زي البصل والطماطم والحبوب الكاملة كل دول فيهم كروميوم ..
والحاجات اللي فيها فيتامين C بتساعد علي امتصاص الكروميوم والحديد .، فحاولوا دايما لما تيجوا تاكلوا حاجة فيها كروميوم أو حديد تاكلوا معاها حاجة فيها فيتامين C هيبقي أفيدلكم ..
أنا كنت ماشية علي الكلام اللي فوق ده زمان عشان صحتي ، مكنتش باكل حاجة من بره تقريبا ، كان أغلب أكلي شوفان وكنت مقللة السكر والرز الأبيض والعيش الأبيض علي قد ما أقدر .. فبجانب الصحة ، لقيت نفسي خسيت حوالي 7 كيلو (بقيت 48 كيلو) .. بس أنا مكنتش عايزة كدة ومكنش عاجبني أن وشي رفع وشكلي اتغير .. فبوظت كل حاجة تاني ورجعت آكل رز وعيش أبيض وكل حاجة فزدت تاني .. المرة دي أنا ماشية معاكوا علي نظام ال plant based علي أمل أن جسمي يبقي صحي وفي نفس الوقت حتي لو فقدت وزن شكلي يبقي أفضل ووشي مش يبقي رفيع .. عايزة أفضل بشكلي الطبيعي عادي وأحسن كمان لو أمكن وفي نفس الوقت آكل أكل صحي ..
المهم .. خلاصة الكلام ، دايما لما تيجوا تاكلوا أي حاجة فكروا في حاجتين ..
1- هل جسمي هيحولها لجلوكوز بسرعة ولا ببطء ؟
2- هل جسمي هيتعرف علي المواد اللي فيها ولا لأ ؟
وياريت من دلوقتي ما تعودوش أطفالكم علي الحلويات عشان هيطلعوا بيدمنوا السكر والمستقبلات اللي في لسانهم هتبقي اتعودت علي طعم الحاجة المسكرة أوي فلما يكبروا مش هيحسوا بحلاوة الفاكهة الطبيعية بسبب أن لسانهم اتعود علي الحاجة الحلوة أوي .. ياريت كمان ما تعودهمش علي المشروبات الغازية وال fast foods.. المشكلة مش مشكلة التخن .. المشكلة في الأمراض التانية اللي منتظرانا لما نكبر نتيجة "ادمان السكر"