بقلم: مريم إبراهيم
بقالي 3 أيام الحمدلله وبدعي من قلبي أكمل ..
جات على بالي حاجة لطيفة جدًا ..
" عن بدنُه فيما أبلاه "
مع الوقت البشرية، إللي أنا منها، أصبحت بتستخدم الأكل بكميات أكبر لدرجة الطفاسة و أصبح الأكل للأسف نوع من أنواع التسلية و القضاء على الزهق .. وبقيت خروجاتنا كلها مطاعم !!
بس بحاول أخلي إحساسي بضميري المرتاح الحمدلله بعد الأكل الصحي يقويني.. وأهو أحسن بكتير من إحساس الندم ولخبطة البطن ووجع السنان بعد العك .. ربنا يثبتنا.
يعني النهاردة ريحة الدوريتوس قلبت معدتي ودي حاجة كويسة جدًا .. حتى الشاي الأخضر تعبلي معدتي!
إكتشفت فعلًا إن الفلوس إللي كنا بنصرفها على الحلويات دي ممكن بربعها نجيب أكل أسبوع خضار وفاكهة! وندي لناس محتاجة بجد.
لو شوفنا كم الأكل اللي بيتعمل في رمضان مثلًا ،إللي هو الهدف من صيامه أصلاً التحكم في النفس والشهوات، هنعرف بجد إن ربنا يريد بنا الخير مش الأذى وإحنا للأسف اللي بنأذي نفسنا. و في الآخر نلاقي نص الأكل بيترمي
في حوار مع صديقتي الجميلة المُلهمة Kitti Rayan وإللي مسلمة ماشاءالله بقالها ٩ سنين ، قالتلي إنها لما قرأت في السُنة إكتشفت إن اللحوم كانت بالنسبة للصحابة تؤكل في المواسم فقط .. زي ما إحنا المفروض ناكلها في عيد الأضحى بس !! حتي إنها لازم تبقى مطهية بطريقة صحية ..
ومع التلوث إللي قضى على الكوكب وعدم إتقاء الله في تربية الغنم أو الفراخ وغذائهم أو نظافة البحر وبالتالي السمك .. محدش بقى يقدر يضمن إن إللي بياكله ده صحي ونظيف 100%.
رسول الله صلَّى الله عليه وسلَّم والصحابة غذائهم كان معتمد بشكل أساسي على التمر والماء .. وكانوا أحيانًا بيغمسوا العيش بالزيت وخلاص كده الحمدُلله !
وطبعًا الحديث إللي كان بيأنب ضميري :"(
"ما مَلأ آدَمِيٌّ وِعَاءً شَرٌّا مِن بَطْنٍ، بِحَسْبِ ابْنِ آدَمَ أُكُلاتٌ يُقِمْنَ صُلْبَهُ فَإِنْ كَانَ لا مَحَالَةَ فَثُلُثٌ لِطَعَامِهِ وَثُلُثٌ لِشَرَابِهِ وَثُلُثٌ لِنَفَسِهِ".
يعني كمان مش المفروض نشبع المفروض نعرف نتنفس!
الموضوع مش سهل ، عايز إرادة و صبر .. صبر ثم صبر ثم صبر !
فكرة إنك قادر/ة تمنع/ي نفسك عن حاجة كنت متقدرش تستغنى عنها زي الملح والسكر تخلي التخلّي عن أي عادة سيئة أسهل بكتير بعون الله.
التدخين أو الكفايين أو أي حاجة مضره ينفع يتمنعوا .. يفرق اية عن قرار إنك مش هتحط/ي زيت في الأكل؟ أكيد مش صعب إن شاءالله.
أنا مثلًا بجاهد و بحاول أتحكم في أعصابي أمام مؤتمرات المائده المستديرة إللي بتنعقد يومًا علشان أكل نص حتة فرخة ولا شوية جبنة قريش حتى !
بإذن الله لما أكمل شهر هجرب مرة وجبة سمك وأنا متأكده إن بطني هتوجعني وقتها
النظام ده بإذن الله يكون في أجر كبير لإننا بنزهد عن أكل كتير كنا فاكريناه بيسلينا ويبسطنا وطلع مؤذي لجسمنا.
وبنطبق سُنّة !!
يعني بدل ما كنا بنعزم بشيبسي وبسكوت نعزم بتمر
تخيلوا كده لو كل حد أخد علبة تمر في الكلية أو الشغل وعزم على صحابة .. بينشر سُنّة !
رسول الله صلَّى الله عليه وسلِّم كان بيحب التمر أوي .. لو أخدنا نية إننا بننفع نفسنا وبنخلي حاجة كويسة كده سُنّة بين الناس إن شاء الله يارب يكون لها أجر كبير.
شكرًا لكل الناس المُلهمة وشكرًا لصديقتي الغالية جدًا Amira Mahdy إنها قالتلي على الجروب العظيم ده. شكرًا لكل حد مش بيبخل بمساعدة أو دعوة أو معلومة و شكرًا للجميلة Ayah Demerdash ジ إللي أنا من إمبارح مصدعاها بأسئلتي
ربنا يثبتنا جميعًا ويقوينا يارب.