بقلم: مصطفى حلمي
السبب هو نوع السعرات.
ال150 سعر بتوع البيبسي هم عبارة عن سعرات كلها جايه من السكر.
الجهاز الوحيد في الجسم المجهز للتعامل مع الفركتوز اللي في السكر هو الكبد.
لما الكبد بيدخل له كمية كبيره من السكر مره واحده..بيبدأ يحس إن جاي له طاقه اكثر من اللي جسمك محتاجه دلوقتي، فبيبدأ يخزن السكر اللي داخل له ده في صورة دهون.
تخزين الدهون ده بيحتاج لإنسولين، لأن أحد وظائف الإنسولين هو إنه يساعد الدهون دي على دخول الخلايا للتخزين.
فال150 سعر بتوع البيبسي بيرهقوا الكبد، وبيرهقوا البنكرياس، وبيتحول معظمهم لدهون بتتخزن في جسمك.
ال150 سعر اللي في الفول، جسمك بيتعامل معاهم بشكل مختلف.
الفول فيه فايبرز كتير، والفايبرز دي بتبطأ عملية إمتصاص السكر اللي في الفول ودخوله في مجرى الدم.
فالكبد يوصل له كميات معقوله من السكر يقدر يتعامل معاها والجسم يستخدمها كطاقه، عكس الضغط المفاجئ اللي حصل له مع سعرات البيبسي وخليته يحولها لدهون وعملت حمل على البنكرياس.
فصحيح الإتنين 150 سعر حراري، لكن كمية الفايبرز اللي في كل واحده فيهم خلت الجسم يتعامل معاهم بطريقة مختلفه تماماً.
وده يودينا لنقطه تانية لا تقل أهمية، وهي أنواع السكر اللي في الأكل.
Simple sugars
أكلات فيها جزيئات سكر منفرده، أو مجموعة جزيئات سهل تكسيرها ودخولها سريع في مجرى الدم.
( السكر المصنع ، العسل، منتجات الألبان، الفواكه، الjunk food)
Complex sugars
اكلات السكر اللي فيها بيبقى في تجمعات كبيره تصل لمئات الجزيئات المترابطه، ودي تكسيرها ودخولها لمجرى الدم بيبقى أصعب وأبطأ.
(النشويات)
Fibers
أكلات السكر اللي فيها بيبقى في تجمعات كبيرة جداً مترابطه بشكل يستحيل تكسيره.
كل الأكل الكامل، اللي على وضعه الطبيعي اللي فيه فايبرز (اللي هو الأكل اللي بقشرته، زي القمح الكامل والرز البني، والفريك وخلافه من الأكل الغير محسن) بيصعب إمتصاص السكر اللي فيه أو عملية إمتصاص السكر بتبقى أبطأ وغير مرهقه للجسم بسبب الفايبرز.
لكن فصل الأكل ده عن الفايبرز اللي فيه (زي تحويل الرز البني إلى رز ابيض، أو تحويل القمح الكامل إلى دقيق أبيض بعد تكسيرهم وفصل قشرتهم) بيحول الأكلات دي من complex sugars لsimple sugars..ويخلي إمتصاص السكر اللي فيها سريع جداً في الدم.
فتلاقي إن تأثير الدقيق الأبيض على الجسم تقريباً مطابق لتأثير السكر المصنع..الإتنين بيرهقوا الكبد والبنكرياس ويتخزنوا كدهون..ونفس الشيء بالنسبه للرز الأبيض والمكرونه البيضه (اللي فيهم شوية فايبرز، لكن اقل من حالتهم الكامله)..
فإنك تاكل عيش أبيض مثلاً، فيه 50 جرام دقيق أبيض..هو بالضبط إنك تاكل 50 جرام سكر.
إنك تاكل بولة كورن فليكس من غير سكر..هي بالضبط كأنك أكلت بولة سكر من غير كورن فليكس.
إنك تشرب عصير برتقال فيه 150 سعر ومافيهوش أي فايبرز..غير خالص إنك تاكل عدد برتقالات فيها 150 سعر برضه بس فيها الفايبرز بتاعتها!