بقلم: هند إبراهيم
السرطان "cancer"
كان زمان الواحد يسمع عنه من بعيد ونادراً كمان مش منتشر ولا حاجة
دلوقتي بقي موجود زي أي حاجة تانية منتشر بشكل مخيف ومريب
يعني إبن جارت صاحبتي لسة مكملش 10 سنين
و إبن عمي الصغير!! لسة لحد دلوقتي مش مصدقة ومش مستوعبة كبيرة وصعبة ومرهقة
زوج عمة صاحبتي كان عنده إكتشفه متأخر ولسة متوفي أول إمبارح
صديق للعيلة من زمان برضوا جاله من فتره
كنت لسة خارجة من يومين قاعدة في food court عشان أنا مبطلة الـ junk food بقالي أكتر من سنة ونص كدة ومبطلة الببسي وأي حاجة زيوا من أكتر من سنتين
فكنت قاعدة أتفرج علي الناس
كان نفسي قوي أقوم أولع في المكان
أنا عشان بقالي شهرين vegan فبقرأ كتير عن أسلوب الأكل إلي إحنا متبعينه وإللي مودينا في داهية.. ويارتنا رايحين الداهية لوحدنا لا شادين ولادنا معانا .. شايفين من الرفاهية إننا نجبلهم sweets مليانة ألوان إصطناعية وسكر ومواد حافظة وسرطانات وسم ونيلة وقطران.. وبإدينا نعودهم علي الـ processed foods و إنهم ياكلوا لحمة 3 مرات في اليوم
كنت ماشية أتفرج علي الوحل إلي إحنا فيه.. لا بجد الموضوع خرج عن السيطرة .. يعني أنا ياما كنت بخرج وأقعد في food court وأختار أجعص أكلة وأنا مبسوطة ومش شايفة أي مشكلة !.
بس الموضوع طلع مشكلة .. طلع مصيبة .. طلع بلوة ..
أنا بقالي أهو شهرين لما أفتكر إلي كنت بعمله في نفسي بزعل أوي وحمدت ربنا كتير إني إكتشفت الموضوع دة بدري لأني من أكتر الحاجات إلي كانت بتأثر فيا وتدايقني هي إني لما أكبر ممكن في يوم أبقي محتاجة لحد أو أمشي بشنطة دوا كدة جميلة مشرفة وأتفشخر بإني أكتر واحد عندها سكر وضغط وقولون وتخينة مالية مركزي كدة وأنهج لو وقفت علي رجلي شوية .. ودة طبعاً من الوضع المحيط بينا .. شايفين نماذج مقلقة
ده غير ربنا يعافينا الأمراض إلي بتطلع فجأ تخلص علي الواحد تجيب أخره وتمشي
أنا الحمد لله لما بدأت مكنش عندي أي مشكلة عشان أبقي vegan ولا كنت عايزة أخس ولا رجلي وجعاني ولا سكر ولا قولون ولا أي حاجة .. ودة إلي هو إنت لما بتكون vegan كل دة بيروح.. و أمراض تانية كتيير كمان بتقل وتتعافي مع الوقت..
- الـ vegan مش "جهاز الكفتة" علي رأي (باسم) بيعمل كل حاجة .. لا خااالص إطلاقاً بتاتاً .. بس أنا لقيت وقريت وشفت نتائج ناس خست وخفت من السكر والضغط , ومشاكل القولون راحت , وتعايشوا مع السرطان بيه عمر!
- من الحاجات إلي بقت موجودة في كل حته و أنا نفسي شايفاها "القولون" ومشكلات القولون
يعني مثلا بنسبة 7 من 10 من الناس إلي أعرفهم وفي سني عندهم قولون !!
ومش هتكلم عن نسبة التخن والربربة أنتوا عارفنها كويس
- القولون دة بقي إيه هو نتيجة طبيعية للتطور إلي في أكلنا بشكل غريب وعجيب ومريب
وتنافس الأمهات في مهارات تسبيك الأكل ومرمطة القيمة الغذائية في كل حاجة
- يعني المحشي حلو تمام مفيد ميضرش لااا إزاي دة إحنا لازم نسبكه كله ونطلع .... أبوه عشان يدوب في البق!! وهو فعلاً هيدوب في البق و هينفش في المعدة وهو والأكل إلي زيه ويرسب أملاح ويعمل فشل كلوي على المدى البعيد وتخن وربربة على المدى المريب .. بس لا لاازم برضوا نغرقه سمنة .. أهم حاجة السمنة عشان الأكل من غير سمنة مينفعش.. السمنة نوع من أنواع الرفاهية .. البيت الي مفهوش سمنة ميبقاش بيت محترم كدة ومرفه "ويملك قوت يومه"
- حتى لما يجوا يعملوا حبة خضار غلبانين ما أذوهمش في حاجة.. لاازم حتماً ضروري تتسبك وتعفن في التسبيكة.. أنا عارفة إن الكلام دة مقرف بس دي هي الحقيقة للأسف..
والبطاطس متتاكلش إلا وهي متحمره ومتشمرة والزيت بيسيل من بقك وإنت بتاكلها
- الرز و العيش و البقوليات والخضار كله عملنالهم عمليات قيصرية وخرجنا منهم كل الفوايد إلي ربنا أنعم بيها علينا و نقعد ناكل طبق فراخ قد كدة ولا لحمة ولا ربح كيلوا سمك و10 بيضات و5 علب تونة ونقول لاااا أصل العيش والرز بيتخن !! بجد؟؟
- أنا من إلي شايلاه في قلبي من الأكل والدنيا المقلوبة بتاعت الأكل ممكن أتكلم في الموضوع دة ومش هخلص كلام بس الخلاصة "you are what you eat"
هتاكل هشاشة وسموم هيجيلك أمراض الدنيا كلها وساعتها لا تلومن إلا نفسك
بس ياريت لو ناوي تمشي في طريقك متشدش عيالك معاك لأن دول أمانة في رقبتك
1- مش عيب لما يتمنع كل الأكل من برا
2- مش عيب لما تعمل الأكل من غير زيت وسمنة ومتغرقوش ملح
3- مش عيب لما تمنع السكر تماماً من حياتك إنت وولادك
4- مش عيب إنك تمنع كل المعلبات والـ processed foods وأي حاجة مش قادر تقرأ
مكونها ومش فاهمها "if you can't read it don't eat it"
5- والأهم من كل دة إنك تقلل اللحمة الفراخ والألبان والجبن
أنا عن نفسي قاطعة كل دة من شهرين بس لو هيكون صعب علي بعض الناس قللوه واحدة واحدة لحد متبطلوه خاالص
- والله الموضوع يستاهل إنك تغير من نظام حياتك و تـ "eat to live not live to eat"
عشان صحتك وصحة ولادك.. عشان تقدر تعبد ربنا صح .. عشان ولادك فجأة ميجلهومش مرض إنت مش عارف حتي تقرأ إسمه من صعوبته .. عشان إنت تقدر تخدمهم لحد ما يكبروا ولما إنت تكبر تفضل قادر تخدم نفسك
- ومهم أوي نفهم إن الموضوع ملهوش علاقة بتخن ورفع .. أصلا الرفيعين يخافوا على نفسهم أكتر لأن جسمهم بيخبي البلاوي أكتر من إلي جسمهم بينفش ويبينها
كلنا مجرمين في حق نفسنا وفي حق ولادنا بس دايما معروف "it's never too late"
إبدأ النهاردة شارك ولو بيوم إستثمره في عمرك و صحتك.. ومش هتندم أكيييد
وربنا يعافينا جميعاً يبعد عننا وعن ولادنا كل أذى أو مرض.. اللهم آمين
50 #ShadesOfHealth
#يوم_جديد_فرصة_جديدة
#الحمدلله