وصفة: توتي حسن
المقادير :
1. 3 كوبيات شوفان.
2. موزة كبيرة أو (2 من الموز البلدى الصغير بتاعنا).
3. 2 كوب و نص مياه .
4. فانيليا أو قرفة.
الطريقة:
هنحط الشوفان و الموز قى الخلاط مع بعض و نضيف عليهم المياه و نضربهم سوا لحد ما يبقى الخليط فى تقل الطحينة كده يعنى مش خفيف و مش تقيل قوى ممكن نضيف فانيليا أو قرفة عشان نزود الطعم.
نسخن طاسة تيفال على النار و نبدى نصب من العجينة براحة لحد ما نعمل قرص صغير كده أو دايرة صغيرة بعد دقيقة او اتنين هنلقيها ابدات تجمد و اطرافها تحمر نقلبها على الناحية التانية.
انا ما حطتش زيت لان الطاسة بتعتى كويسة و لسه جديدة بس لو الطاسة هتلزق منك ممكن تحط نقطة زيت و بعد كده تمسحها بمانديل ورق أول مرة بس.
التقديم بقى هنحط البان كيك فى الطبق و عليه اى نوع فاكهة ( موز – كيوى – فراولة) و ممكن نعمل صوص فراولة عبارة عن فراولة يضربوا فى الخلاط مع واحدة أو اتنين بلح بس بشوية مياه قليقين جدا و يتحطوا على النار لمدة 5 – 10 دقائق لحد ما يغلوا شوية و يثقلوا كده – بالهنا و الشفا.
ملحوظة : الوصفة الاصلية بيتعمل بيها وافل بس انا معنديش جهاز الوافل اللى عنده ممكن يستخدمه عادى وده فيديو الوصفة الاصلية https://www.youtube.com/watch?v=vw_NAh00gOg