بقلم: علا سالم
والحقيقة انا مااتعاملتش مع الموضوع بعنف و تحمس مبالغ يتبعه احباط مبالغ ، انا ابتديت اني قطعت السكر تمام من اكلي و كنت بقرا كل منتج بشتريه و بستبعد اي حاجة فيها مكون السكر..
بعدين لاقيت خلال شهرين تلاتة ان صحتى اتحسنت ومناعتي قويت, فقررت استبعد كل حاجة لونها ابيض او مجروشة او متقشرة وبقيت باكل كل حاجة كاملة وبني..
وبعدها النتايج اذهلتني اكتر فقررت اوقف الالبان و اللحوم..
والحقيقة الحته دي ماتعبتنيش قد السكر لاني مش متعلقة باللحوم خالص .. فضلت مشكلتى مع كام نوع الجبنة و كام نوع السمك اللي بحبهم..
بس المفاجأة اني بعد فترة صغيرة جدا حواسي بقت قوية جدا و مابقيتش بقدر اتعرض للمنتجات اللي بحبها او اشمها من كتر ما ريحتها بقت نفاذة في مناخيري ومعدتي..
انا بحكي كل ده لان ده اسلوب حياة التزام شخصي لانك بتحاول تحترم جسمك اللي بيحتويك وتقدره.. وهي مش ملة ولا ديانة ولا محتاجة شقاء ولا توتر نهائى ..
الانترنت مليان كتب و اليوتيوب مليان وصفات سهلة و بسيطة تنفع تتطبق كل يوم.. ولما هتحترفوا الموضوع هتحضروا اكلاتكوا في ربع ساعة بالكتير.
اتمنى تقروا و ماتستنفذوش الوقت في السؤال عن حاجات متجاوب عليها او بديهية عشان مانتوهش من بعض و بالتوفيق للكل ..