بقلم: محمد عبد الحميد
رغم اني في كلية كويسة وتقدير كويس بس مش دا اللي انا عاوزه وكمان فيه الاحسن مني
رغم علاقتي مع اهلي واصحابي كويسه لكن مع الناس تعاملاتي محدودة مش لاني مش اجتماعي لكن اسباب كتيرة منها الوزن الزائد
دا كله مدعم بإني مش عايش صح من ناحية حجات كتير اكل ورياضه وقراءة .... حجات كتير
فانا بعتبر نفسي ديما فاشل بالتقريب
وكنت ضعيف جدا جدا .. بضعف قدام اكل لذته ممكن دقايق صغيرة .. وكنت اضحك علي نفسي واقول كونك تقدر تاكل فانت كدا صحتك حلوة .. عارف اني كنت كذاب .. لان التتايج واضحة .. ركبة بتوجعني وجع دائم .. لو عملت اقل مجهود بهبط وانهج .. معرض في اي وقت لاني اكون مريض بمرض مزمن .. وكنت كل اتغاضي عنه .. واكمل في ضعفي بغباء ..
بس جات فترة اني خلاص مش هقدر اكمل كدا بس كانت مدتها ف دماغي لا تتحاوز مدة انتظاري لساندوتش الشاورما ولا لفة علبة الحاتوة ولا الكنافه .. بس اللي دعم موضوع انه كفاية كدا وخلاص حاسب علي نفسك اللي جاي هيبقي اصعب
هو اني فاشل واني لو خسيت يعتبر نجاح افتخر بيه قدام اي حد واحطه في السي في بتاعي
بس برده دا محصلش وكملت عادي ورحت طلبت كنتاكي وبعده واحدة سنكرز وبيبسي دايت عشان متخنش 😂
بس جه وقت وتخيلت نفسي اني مش قادر اشيل بنتي واطلع بيها السلم والاعبها واني احرمها مني بدري نظرا لاني هكون صاحب مرض واولهم السمنة
الامر دا حركني شوية .. دخلت محلات رياضية كتير عشان اشتري تيشرت النادي اللي بحبه يقولي مقاسك مش موجود عدي علينا يوم كذا واعدي وبرده مفيش
اللبس مش مناسب لزوقي واول ما الاقي مقاسي هوب اخده وخلاص
كل دا بالتزامن مع بوست مصطفى حلمي
تقريبا اقنعني بكلامه من غير حتي ما اعيد البوست بتاعه .. بدأت اتحرك في الموضوع .. تقريبا كله استهزء بالموضوع عدا امي وابويا رغم قناعتهم اني لو مكلتش لحوم هيحصلي حاجة بس شجعوني ع قراري
طلعت ع الميزان لقيت نفسي 141.5
عادي قلت لازم انجح في دا وخدت القرار اني لازم اخس
وخدت الامر انه للخسسان بس
لكن تغيرت وجهتي للامر خالص بعد اسبوعين اما حسيت نفسي بجد ولقيت روحي واعتذرت ليا كتير علي اللي عملته لنفسي بسبب الاكل حتي لو مكمش كتير بس كله اضرار
بدأت احس اني خفيف بعد اول اسبوع
الطاقة اكبر والتعب اقل مهما كان المجهود والنوم اتظبط ومعتش احس بالكسل
بخلاف اني بدأت اعرف معني الاشياء .. وطعم الاكل الحقيقي .. جوايا طاقة اني اعمل اي حاجة
رجعت تاني اقرأ كتب .ابحث في المواضيع
رجعت لهوايتي تاني بعد ما بطلتها من سنه وزيادة
بخرج مع اصحابي عادي واحس نفسي اني اكثرهم نشاط واخفهم رغم اني اكثرهم وزنا
وبالوقت بدأت اتخلي عن الميزان
واخر مرة وزنت نفسي من يومين كنت 127 ك في اقل من 40 يوم بس
بدأت انشر الموضوع بين اللي اعرفهم واقنع الناس .. اختي اقتنعت وامي بدأت بس ع خفيف جدا .. احد صحابي بدأ ياخد الخطوة دي بجد
انا متشكر ليكم جدا لانكم احلي صحبة .. صحبة الحياة فعلا