بقلم: عمر عادل
السلام عليكم ياشعب الplant based العظيم.
انا حبيت احكي عن تجربتي لحد الوقتي بعد مرور 40 يوم بالظبط يعني من يوم 1/1/2016 بالتحديد بعد ماقرأت ومر عليا بوست الأستاذ مصطفى حلمي.
أولاً أحب احكي عن حالتي من شهرين بالظبط...
أنا عندي 18 سنة وزني كان 102 تقريباً ونسبة الدهون ف جسمي كانت حوالي 29% -ماعملتش كشف كامل على نسبة السكر والكولسترول وغيرها لسة-
كان وزني مسببلي مشاكل كتير بالرغم من ان اكلتي مش كبيرة بالمقارنة بناس كتير، ولكن عادات أكلي كانت كلها غلط في غلط منذ الطفولة
بمجرد ماقرأت بوست الأستاذ مصطفى وكملت الباقي من الدكتور باسم
أخذت القرار في لحظتها ومنعت تماماً:
(الملح-السكر-الزيوت-اللحوم-الألبان-المعلبات والمحفوظات) وكل ماهو مضر وممنوع وبدأت ف الرجيم واتعشيت خضار يومها ونمت مكسور المعدة :'D
مانكرش ان اول أسبوع كان غريب جداً وأكله كان مش مفهوم!
بعد كدة بدأت أعرف راسي من رجليا والحمد لله نادراً مابجوع.
مابقيتش بقوم من النوم مهدود ولا جايلي خمول.
ماعدش فيه مشاكل ف الهضم مهما الواحد ياكل علشان الخضراوات الكتير الحمد لله.
ماعدتش ضيق الأفق بخصوص الأكل بسبب تعدد البدائل ف جميع الأكلات.
عرفت الجروب بالصدفة من 10 أيام وتقريباً 90% من اللي كنت بسأل عليه ف نفسي عرفته هنا وأضفت على معلوماتي كتير ودي حاجة مفرحاني جداً.
الحمد لله انا بقيت خلاص في غنا عن اي حاجة غير نباتية وتقريبا مابقيتش بحس بعدم وجود الملح ولا فقدان السكر وبقى عندي علم بأنواع كتير من البهارات وطرق الطهي المختلفة والصحية ودا الجانب الحياتي..
نيجي بقى للجانب الصحي مباشرة بعد الوزن النهاردة لقيت الآتي:..
وزني: 93 كيلو -مع الأخذ بعين الاعتبار اني بلعب رياضة وبشيل حديد-
ضغط الدم طبيعي
السكر الحمد لله طبيعي
نسبة الدهون: 25%
كنت عامل حسابي اجيب هدوم جديدة بعد مأخس بس باين كدة اني هعمل اعادة تدوير لهدوم كتير عندي ولحد الوقتي مش مصدق الفرحة والله
وماكنتش ناوي اكلم اي حد ف النظام دا الا لما النتايج تبدأ تظهر عليا وتبان
والحمد لله بدأت ف موضوع الدعوة وفيه ناس بدأت تكفر باللحوم منهم امي الحمد لله
واحنا هنا نسند بعض ونلاقي حلول ونشجع بعض ويارب اللي يبدأ ف النظام دا مايستسلمش من أول كام يوم ويعافر ﻷن النتايج هايلة.
شكراً يادكتور باسم.
شكراً يأستاذ مصطفى جداً
دمتم نباتيين ويارب يكون حد اتشجع لما قرأ وآسف طولت عليكم شوية.